Para se t’i bashkëngjitet firmës, Z. Pallaska punoi për më shumë se shtatë vite për Zyrën e Departamentit të Drejtësisë të Shteteve të Bashkuara në Prishtinë. Në cilësinë e Specialistit Ligjor, Z. Pallaska zhvilloi dhe menaxhoi programe në vlerë rreth 4.5 milionë dollarë të dedikuara për zhvillimin dhe reformimin e sistemit gjyqësor në Kosovë. Arritjet kyçe të tij në këtë pozitë përfshijnë zhvillimin e politikave publike lidhur me ristrukturimin e sistemit të drejtësisë në Kosovë, zhvillimin e ligjeve mbi sistemin gjyqësor në Kosovë, shërbimin prokurorial dhe policor si dhe hartimin e ligjit kundër shpëlarjes së parave, ligjit mbi procedurat e shqyrtimit për emërimin e gjykatësve dhe prokurorëve si dhe ligjit mbi negocimin e pranimit të fajësisë. Për më tepër, Z. Pallaska ishte anëtar i grupit të ekspertëve të Misionit të Kombeve të Bashkuara në Kosovë përgjegjës për hartimin e Komentarit mbi Kodin e Procedurës Penale në Kosovë dhe ishte person kyç në themelimin e klinikës së parë juridike në Universitetin e Prishtinës. Ai gjithashtu ishte njëri nga iniciatorët për themelimin e Shoqatës së Prokurorëve Publik të Kosovës. Për arritjet e lartpërmendura ai pranoi gjashtë çmime të rëndësishme nga Departamenti i Shtetit të Shteteve të Bashkuara, ku më prestigjiozi ishte Çmimi i Lartë Nderi, i nënshkruar nga Ndihmës Sekretari i Shtetit të Shteteve të Bashkuara.

Në vitet 2009 dhe 2011 Z. Pallaska shërbeu si ekspert kryesor i jashtëm në procesin e themelimit dhe konsolidimit të Gjykatës Kushtetuese të Republikës së Kosovës. Në mars 2012, Gjykata Kushtetuese i akordoi Z. Pallaskës Certifikatën e Vlerësimit për “kontributin e paçmueshëm në themelimin, konsolidimin dhe suksesin e Gjykatës Kushtetuese të Republikës së Kosovës dhe [...] përkushtimin për avancimin e drejtësisë kushtetuese në Kosovë”. Në vitin 2011, Z. Pallaska u emërua nga Presidentja e Republikës së Kosovës si ekspert i pavarur në Komisionin për Ndryshimet Kushtetuese të Kuvendit të Kosovës. Angazhimi i Z. Pallaska si ekspert i pavarur përfundoi pasi që Gjykata Kushtetuese e Republikës së Kosovës më 20 korrik 2012 lëshoi Vendimin per vazhdimin e mandatit të Presidentes së Republikës së Kosovës deri në vitin 2016. Si mirënjohje për punën e Z. Pallaska, Presidentja e Republikes se Kosoves me daten 26 tetor 2012 i ndau Z. Pallaska Mirënjohjen për " kontributin e pazëvendësueshëm në promovimin dhe mbrojtjen e drejtësisë dhe rendit kushtetues në Republikën e Kosovës...duke treguar një shembull të mirë të shërbimit ndaj vendit në baza vullnetare" . Z. Pallaska kreu këtë detyrë në baza pro bono . Përfundimisht, prej vitit 2012 deri në vitin 2014, Z. Pallaska shërbeu si Sekretar i Përgjithshëm i Bordit të Guvernatorëve të Odës Ekonomike Amerikane në Kosovë dhe udhëhoqi Qendrën për Zgjidhjen Alternative të Mosmarrëveshjeve të kësaj ode.